英基學校由小一開始就用普教中，同埋簡體字教材。我而家做緊補習老師，幫小學生補中文。有家長會要求我用普通話教，亦有家長叫我用番廣東話教就得。
我覺得太細個用普教中唔係好事。當一個小朋友連廣東話都未學好，再一次過將普、粵、英語咁拋落佢度，難免會導致三文兩語講得唔鹹唔淡。
如果你話應該自小學語言，我覺得好似現時某啲學校咁，用粵教中加普通話堂係可行既方案。一來，學生可以接觸到普通話，二來，唔會因為覺得普教中太難，而怕左中文。再者，叫本地老師用普教中，也許會對佢地造成壓力，而且唔同既非母語老師 (non native speakers of Putonghua) 既普通話程度亦難免會有差異，令教學效果未必最理想。
我小學同中學時，平時係屋企講廣東話，係學校聽英文，上中文堂用普通話。雖然我自問廣東話流利，但有啲字我會讀錯個音，例如將 “諷刺” 讀成 “鳳刺”、“朽壞” 讀成 “考壞” 等。對於呢啲比較少用既字，有時真係要諗，到底呢個字點讀呢？
我唔反對學普通話，亦唔反對普教中，但我覺得去到最後，最緊要既係睇番每個學生既需要，然後因應佢地既需要而按排適合既教學方法比佢地。其實中英都一樣，有唔少英文學校既學生面對同一個問題，達唔到雙語 (bilingual) 程度，反而變得對唔同語言既認知唔鹹唔淡，非常可惜。
